BIZIPENAK

Izena. Plurala. Norbanakoak bizi izandako esperientzia eta gertaeretako bakoitza, haren izaera eta nortasunaren eraketan parte garrantzitsu dena. Hauxe baita "bizipenak" hitzaren esanahia. Hori dela eta, nire haurtzaroaren bizipenak gogoratzeko eskatzen didaten bakoitzean, bizi izandako unerik hoberenak, dibertigarrienak, sentikorrenak... burura etortzen zaizkit.

Txiki-txikitatik ikastolan antolatzen genituen ekitaldi mota guztiak ikaragarri gustatzen zitzaizkidan. Une ederrak ziren, gogoratzekoak. Hemen utziko dizuet bideo txiki bat, non une horietako hamar argazki ikusi daitezkeen.

SANTA AGEDA OSPATZEN

Lehenengo hiru argazkiak Santa Ageda egunekoak dira. Argazki hauek milaka gauza eta momentu onak ekartzen dizkidate burura. Egia esan, atzo izan balitz bezala gogora dezaket.

Hasteko, Santa Ageda eguna ospatu baino egun batzuk lehenago, klaseko irakasleak paper bat ematen zigun  non egun horretan baserritar jantziarekin joan behar ginela eta gure Santa Agedako makila eraman behar genuela esanez. Aurreko egunean hain zuzen ere, nire baserritar jantzia eta makila ohe ondo-ondoan utzi eta dena prest utzi eta gero, goiz oheratzen nintzen; ikastolan egiten genituen ekitaldi guztiak zoratzen ninduten eta.

Eguna iritsi eta klase-kide guztiak, irakaslearekin batera, kalean zehar joaten ginen kantuka. Gure makilekin lagunduta, Santa Agedako abesti ospetsuenak abesten genituen eta gero, eremu horretako auzokideek litxarreriak eta bestelako janaria oparitzen ziguten. Eguna amaitzen zelarik, janari eta litxarreri guztiekin, ikastola guztirako merendola bat prestatzen genuen.

Adiskidetasuna, zoriontasuna, eskuzabaltasuna... dira gogoratzen ditudan sentimendu batzuk.

INAUTERIAK

Hurrengo hiru argazkiak inauteriak ikastolan nola ospatzen genituen adierazten dute. Ipotx, pirata...

Inauteriak ospatzea izugarrizko poztasuna eragiten zidan. Oraindik gogora dezaket irakasleak mozorro desberdinak proposatzen zizkigun eguna, gero guk proposaturikoetatik bat aukeratzeko. Baina hori ez zen egin eta prestatu beharreko guztia, ez horixe; denon artean mozorroak egiten genituen eta dantza bat prestatzen genuen.

Inauteriak ospatzeko eguna iritsi eta denok urduritasuna nabaritzen genuen gure baitan: datzaren urrats guztiak birpasatu, mozorrotu, azken xehetasunak egin... Urtero espero genuen unea iristen zen! Korrika batean, lagun guztiak areto nagusira joan eta ekitaldiarekin hasten genuen.

Sekulako eguna zen! Beste pertsonai baten papera hartzen genuen, horren inguruko jolasak egiten genituen eta mundua beste perspektiba batetik ikusten genuen egun batez. Momentuan, jolasteko eta ongi pasatzeko eguna zen; baina, orain ikusi dezaket nola inauteriak, hain txikitatik, beste pertsonai baten papera hartzean enpatia garatzen laguntzen zigun.

OLENTZEROREKIN GABONAK OSPATZEN

Bukatzeko, bideoan azkenengo lau argazkiak nire ikastolako Gabonen ingurukoak dira: Olentzerok egiten zigun bisita, ikasle guztiak egiten genuen euskal dantzak eta orokorrean egiten genuen ekitaldia.

Gabonak ez ziren egun bateko zerbait, abendua hasten zenetik hilabete liluragarri osoa zen. Abenduko lehenengo astean, denon artean Olentzerori gutun bat idazten genion. Gutun horretan, klase osorako nahi genituen jolasak eta liburuak idazten genituen, gero gutun hori postez bidali ahal izateko. Baina hori ez zen egin beharreko guztia. Gutuna idatzi eta gero, gure gela apaintzen genuen ilusioz beteta.

Gabonak ospatzeko eguna iritsitakoan, bisita hunkigarria genuen: Olentzeroren bisita. Olentzerok, opariz kargaturik, ikastolara etortzen zen gure ilusioa areagotzeko. Opari guztiak ireki eta munduko umerik alaienak ginen. Geroago, denok areto nagusira joaten ginen korrika eta saltoka, gune Gabonetako ekitaldia hasteko prest.

Ekitaldian, dantza desberdinak egiten genituen, euskal dantzak barne. Mailaz maila dantzatzen genuen, guztira bederatzi ikuskizun egin arte. Kurtso osoko unerik miresgarriena zen.

Ilusioa, alaitasuna, miresgarritasuna, adiskidetasuna, eskuzabaltasuna, poztasuna, xarmagarritasuna...